ပဲခူး ၂၀၁၈ အောက်တိုဘာ ၁၅
၂၀၁၈ ခုနှစ်၊ပဲခူးတိုင်းဒေသကြီး(အနောက်ပိုင်း) (၅)မြို့နယ်အခြေခံပညာစာတတ် မြောက်ရေး လုပ်ငန်းဖွင့်ပွဲအခမ်းအနားကို၁၅၊ ၁၀၊ ၂၀၁၈ ရက်နေ့ နံနက် ၉ နာရီတွင် ပြည်မြို့ သီရိခေတ္တရာရတနာမြို့တော်ခန်းမ၌ကျင်းပရာ ပညာရေးဝန်ကြီးဌာန ပြည်ထောင်စုဝန်ကြီး ဒေါက်တာမျိုးသိမ်းကြီး၊ ပဲခူးတိုင်းဒေသကြီးအစိုးရအဖွဲ့ဝန်ကြီးချုပ် ဦးဝင်းသိန်း၊ တိုင်းဒေသကြီး ၀န်ကြီးများ၊ လွှတ်တော်ကိ်ုယ်စားလှယ်များ၊ အမျိုးသားမူဝါဒကော်မရှင်အဖွဲ့ဝင်များ၊ ပညာရေး ၀န်ကြီးဌာနမှ ညွှန်ကြားရေးမှူးချုပ်၊ဒုတိယညွှန်ကြားရေးမှူးချုပ်များ၊ ကောလိပ် ကျောင်းအုပ်ကြီးများ၊ ပဲခူးတိုင်းဒေသကြီး အခြေခံစာတတ်မြောက်ရေးလုပ်ငန်းကြီးကြပ်မှု ကော်မတီဝင်များ၊ တိုင်းခရိုင် မြို့နယ်အဆင့် ဌာနဆိုင်ရာများ၊ ကျောင်းပြင်ပနှင့်တစ်သက်တာ ပညာရေးဦးစီးဌာနမှတာဝန်ရှိသူများ၊ ဖိတ်ကြားထားသောဧည့်သည်တော်များ ၊ စေတနာဖြင့် လုပ်အားပေးဆောင်ရွက်ကြမည့် ပြည်တက္ကသိုလ်၊ ပြည်ပညာရေးကောလိပ်များမှ ကျောင်းသား ကျောင်းသူများဆရာဆရာမများနှင့် ပညာရေးမိသားစုများတက်ရောက်ကြသည်။
ရှေးဦးစွာပြည်တက္ကသိုလ်ကျောင်းသားကျောင်းသူများက “တို့အင် တို့အား” စာတတ်မြောက်ရေးသီချင်းဖြင့် သီဆိုဂုဏ်ပြုဖွင့်လှစ်ကြသည်။ ထို့နောက် ပဲခူးတိုင်းဒေသကြီးအစိုးရအဖွဲ့ ၀န်ကြီးချုပ်ဦးဝင်းသိန်းက ပဲခူးတိုင်းဒေသကြီး အခြေခံစာတတ်မြောက်ရေးလုပ်ငန်းအောင်မြင်ရေးအတွက် ဌာနပေါင်းစုံပူးပေါင်းကူညီဆောင်ရွက် ပေးကြရန် ပြည်သူတို့၏ လူနေမှုဘ၀ပိုမိုမြင့်မားရေးအတွက် အခြေခံအကျဆုံးဖြစ်သည့် စာတတ် မြောက်ရေးလုပ်ငန်းစဉ်တွင် စာသင်သားများစေတနာရှင်လုပ်အားပေးနည်းပြများနှင့်ကြီးကြပ်များ၏ လိုအပ်ချက်များကို ဝိုင်းဝန်း ဖြည့်ဆည်းကူညီဆောင်ရွက်ပေးကြရန်နှင့် စာသင်သားအရေအတွက် တိုးလာပါကလည်းသက်ဆိုင်ရာသို့ အချိန်မီစာရင်းပေးသွင်းဆောင်ရွက်ကြရန် စသည်ဖြင့် အဖွင့်အမှာစကားပြောကြားသည်။ ဆက်လက်၍ ပညာရေးဝန်ကြီးဌာန ပြည်ထောင်စုဝန်ကြီး ဒေါက်တာမျိုးသိမ်းကြီး အဖွင့်အမှာစကား ပြောကြားသည်။ ပြည်ထောင်စုဝန်ကြီးက အဖွင့်အမှာစကားပြောကြားရာတွင် ပညာရေးဝန်ကြီးဌာနအနေဖြင့် ပဲခူးတိုင်းဒေသကြီးတွင် သက်ကြီးစာတတ်မြောက်မှုနှုန်း မြင့်မားရေးနှင့် စဉ်ဆက်ပညာသင်ယူမှုကို အားပေးမြှင့်တင်ဆောင်ရွက်နေခြင်းဖြစ်ပါကြောင်း ယခင်အခါကအခြေခံစာတတ်မြောက်ရေးလုပ်ငန်းများကို နွေရာသီကာလတွင်သာဆောင်ရွက်ပေးနိုင်ခဲ့သော်လည်း ယခုအခါ သက်ဆိုင်ရာတိုင်းဒေသကြီး ပြည်နယ်အစိုးရအဖွဲ့များနှင့် ပူးပေါင်း၍ တစ်ဆယ့်နှစ်ရာသီပတ်လုံး အင်တိုက်အားတိုက်အကောင်အထည်ဖော်ဆောင်ရွက်နေပြီဖြစ်ပါကြောင်း ၂၀၁၄ခုနှစ် သန်းခေါင်စာရင်း အစီရင်ခံစာအရ စာတတ်မြောက်မှုနှုန်းနည်းပါးသောမြို့နယ်များ၊ သက်ဆိုင်ရာတိုင်းဒေသကြီး ပြည်နယ် အစိုးရအဖွဲ့များကညှိနှိုင်းသတ်မှတ်ပေးသောမြို့နယ်များ၊ နိုင်ငံတော်၏ လိုအပ်ချက်အရ ဆောင်ရွက်ပေးရမည့် ဒေသတွင်းရှိမြို့နယ်များတွင် အခြေခံစာတတ်မြောက်ရေးလုပ်ငန်းကို ဦးစားပေးအကောင်အထည်ဖော် ဆောင်ရွက်နေပါကြောင်း ယခုအခါ ပဲခူးတိုင်းဒေသကြီး (အနောက်ပိုင်း) ပေါက်ခေါင်း၊ ပေါင်းတည်၊ အုတ်ဖို၊ လက်ပံတန်းနှင့် သာယာဝတီ(၅)မြို့နယ်တွင် အောက်တိုဘာလ (၁၆) ရက်မှ နိုဝင်ဘာလ (၂၄) ရက်နေ့အထိရက်ပေါင်း (၄၀)အတွင်း စာသင်ဝိုင်း(၁၉၈)ဝိုင်းမှ စာသင်သား(၂၁၁၇)ဦးအားစေတနာရှင် လုပ်အားပေးနည်းပြနှင့်ကြီးကြပ် (၄၁၆) ဦးတို့ကသင်ကြားပေးသွားမည်ဖြစ်ပါကြောင်း စာသင်သားများအား အရေး၊အဖတ်၊အတွက် သင်တန်းသုံးစာအုပ်များအပြင် သင်တန်းပြီးသည့်အခါ ဆက်လက်ဖတ်ရှုလေ့လာနိုင်ရန်အတွက် စာဖတ်ရှိန်မြှင့်တင်ရေး ဘ၀သာယာရေး ၀င်ငွေတိုးလုပ်ငန်းများဆိုင်ရာ စာစဉ်များကိုလည်း ပေးအပ်သွားမည်ဖြစ်ပါကြောင်း အခြေခံစာတတ်မြောက်လုပ်ငန်း အောင်မြင်ရေးအတွက် ဝိုင်းဝန်း ပံ့ပိုးကူညီဆောင်ရွက်ပေးကြသူများအားလုံးကို အထူးကျေးဇူးတင်ပါကြောင်းစသည်ဖြင့် အမှာစကားပြောကြားသည်။ ထို့နောက်ပြည်ပညာရေးကောလိပ် ကျောင်းသားကျောင်းသူများက “ထာဝရမြန်မာ“ တိုင်းရင်းသားတေးသရုပ်ဖော်အကဖြင့် သီဆိုဂုဏ်ပြုကြသည်။ ယင်းနောက် ကျောင်းပြင်ပနှင့်တစ်သက်တာပညာရေးဦးစီးဌာန ညွှန်ကြားရေးမှူးချုပ် (တာဝန်)ဒေါက်တာဇော်ဝင်းက အခြေခံစာတတ်မြောက်ရေးလုပ်ငန်းနှင့်စပ်လျဉ်း၍ ရှင်းလင်း တင်ပြသည်။ ဆက်လက်၍ ပြည်တက္ကသိုလ်ကျောင်းသားကျောင်းသူများက “ယဉ်ကျေးမှုအစ ပျူအက“ဖြင့်ဂုဏ်ပြုဖျော်ဖြေကြသည်။ ထို့နောက် ပဲခူးတိုင်းဒေသကြီး(အနောက်ပိုင်း) (၅)မြို့နယ် အခြေခံစာတတ်မြောက်ရေး လုပ်ငန်း စာသင်ဝိုင်းများအတွက် ထောက်ပံ့ပစ္စည်းများအား ပြည်ထောင်စုဝန်ကြီး၊ တိုင်းဒေသကြီး အစိုးရအဖွဲ့ဝန်ကြီးချုပ်နှင့် စည်ပင်သာယာရေးနှင့် လူမှုရေးဝန်ကြီးတို့က ပေးအပ်ရာ သက်ဆိုင်ရာမြို့နယ်တာဝန်ရှိသူများက လက်ခံရယူကြသည်။ ယင်းနောက် အခြေခံစာတတ်မြောက်ရေးလုပ်ငန်းဖွင့်ပွဲတွင် ဂုဏ်ပြုဖျော်ဖြေခဲ့ကြသော ကျောင်းသားကျောင်းသူအကအဖွဲ့များအား ပြည်ထောင်စုဝန်ကြီးကဂုဏ်ပြုဆုငွေချီးမြှင့်ပေးအပ်ပြီးအမှတ်တရစုပေါင်းဓါတ်ပုံများရိုက်ကူးကြသည်။ ထို့နောက် ခင်းကျင်းပြသထားသော ပြခန်းများအား ပြည်ထောင်စုဝန်ကြီး၊ ၀န်ကြီးချုပ်နှင့် ဧည့်သည်တော်များကလှည့်လည်ကြည့်ရှုကြသည်။ ထိုမှတဆင့် ပြည်ထောင်စုဝန်ကြီးနှင့်အဖွဲ့သည် ပြည်တက္ကသိုလ်သို့ ရောက်ရှိကာ အစည်းအေ၀း ခန်းမ၌ တက္ကသိုလ်၊ ကောလိပ်များမှ ပါမောက္ခချုပ် ကျောင်းအုပ်ကြီး များဆရာဆရာမများ၊ ပညာရေးမိသားစုများနှင့်တွေ့ဆုံ၍ ပညာရေးအရည်အသွေးမြင့်မားရေး သင်ကြားသင်ယူရေးနှင့် စီမံခန့်ခွဲရေးပိုမိုကောင်းမွန်ရေးအတွက် ဆွေးနွေးမှာကြားသည်။ ယင်းနောက် တက်ရောက်လာသူများကသိရှိလိုသည်များကိုမေးမြန်းရာ ပြည်ထောင်စုဝန်ကြီးနှင့် တာဝန်ရှိသူများက ပြန်လည်ဆွေးနွေးဖြေကြားသည်။ ထိုမှတဆင့် ပြည်ထောင်စုဝန်ကြီးနှင့်အဖွဲ့သည် ပဲခူးတိုင်းဒေသကြီးပညာရေးမှူးရုံး၊ ပြည်မြို့(ရုံးခွဲ)တွင် တိုင်းဒေသကြီးခရိုင် မြို့နယ်ပညာရေးမှူးများနှင့်တွေ့ဆုံ၍ ပညာရေးဆိုင်ရာ လုပ်ငန်းစဉ်များဆွေးနွေးမှာကြားသည်။ ဆက်လက်၍ ပြည်ထောင်စုဝန်ကြီး ၀န်ကြီးချုပ်နှင့်တာဝန်ရှိသူများသည် ပြည်ပညာရေး ကောလိပ်တည်ဆောက်ရေးစီမံကိန်းများကို သွားရောက်ကြည့်ရှုစစ်ဆေးခဲ့ကြောင်းသတင်း ရရှိသည်။
No comments:
Post a Comment