နေပြည်တော် ၂၀၁၈ မတ် ၈
ပညာရေးဝန်ကြီးဌာန ပြည်ထောင်စုဝန်ကြီး ဒေါက်တာမျိုးသိမ်းကြီးသည် မြန်မာနိုင်ငံစာစစ်ဦးစီးဌာန ညွှန်ကြားရေးမှူးချုပ်ဦးမျိုးညွန့်၊ အခြေခံပညာဦးစီးဌာနမှ ခေတ္တညွှန်ကြားရေးမှူးချုပ်၊ ဒုတိယညွှန်ကြားရေးချုပ်များနှင့် သက်ဆိုင်ရာတာဝန်ရှိသူများလိုက်ပါလျှက် မတ်လ၈ရက်နေ့ နံနက်ပိုင်းတွင် နေပြည်တော် လယ်ဝေးမြို့နယ်အမှတ်(၁) အခြေခံပညာအထက်တန်းကျောင်းရှိ ၂၀၁၈ခုနှစ် တက္ကသိုလ်ဝင်စာမေးပွဲ စာစစ်ဌာနသို့ရောက်ရှိပြီး တက္ကသိုလ်ဝင်စာမေးပွဲဒုတိယနေ့ (အင်္ဂလိပ်ဘာသာ)ဖြေဆိုနေမှုများကို လှည့်လည်ကြည့်ရှုသည်။
ပြည်ထောင်စုဝန်ကြီးသည် ကျောင်းသား ကျောင်းသူများ အင်္ဂလိပ်စာဘာသာဖြေဆိုနေမှုများနှင့် စာမေးပွဲဆိုင်ရာလုပ်ငန်းဆောင်ရွက်မှုများကို လှည့်လည်ကြည့်ရှုပြီး သက်ဆိုင်ရာတာဝန်ရှိသူများအား ကျောင်းသား ကျောင်းသူများ စာမေးပွဲ ကာလအတွင်း စိတ်အေးချမ်းသာစွာဖြင့် ဖြေဆိုနိုင်ရေး ဆောင်ရွက်ပေးကြရန် မှာကြားသည်။ အလားတူ မြန်မာနိုင်ငံစာစစ်ဦးစီးဌာန ညွှန်ကြားရေးမှူးချုပ်ဦးမျိုးညွန့်သည် တာဝန်ရှိသူများလိုက်ပါလျှက် လယ်ဝေးမြို့နယ် သဲဖြူ အခြေခံပညာအထက်တန်းကျောင်း၊ အမှတ်(၅)အခြေခံပညာ အထက်တန်းကျောင်း(အေလာ)၊ ပျဉ်းမနားမြို့နယ်သစ်လေးလုံး အခြေခံပညာအထက်တန်းကျောင်း၊ အမှတ်(၃)အခြေခံပညာအထက်တန်းကျောင်းနှင့် ဥတ္တရသီရိမြို့နယ် အမှတ်(၁၂) အခြေခံပညာအထက်တန်းကျောင်းရှိ စာစစ်ဌာနများသို့သွားရောက်ပြီး စာမေးပွဲဖြေဆိုနေမှုများကို ကြည့်ရှုကာ စာမေးပွဲ ကြီးကြပ်ဆရာ၊ ဆရာမများအားစာမေးပွဲ စည်းမျဉ်းစည်းကမ်းများ၊ ညွှန်ကြားချက်များနှင့်အညီ ဆောင်ရွက်ကြရန်၊ တက္ကသိုလ်ဝင်စာမေးပွဲ အောင်မြင်ချောမွေ့စွာ ဖြေဆိုကျင်းပနိုင်ရေး ဝိုင်းဝန်းကူညီဆောင်ရွက် ပေးကြရန်မှာကြားသည်။ တက္ကသိုလ်ဝင်စာမေးပွဲ ဒုတိယနေ့ အင်္ဂလိပ်စာဘာသာကို မြန်မာနိုင်ငံ တစ်ဝန်းလုံးရှိ စာစစ်ဌာန(၁၇၂၁)ခုနှင့် နိုင်ငံခြားစာစစ်ဌာန(၂၁)ခု စုစုပေါင်းစာစစ်ဌာန(၁၇၄၂)ခုတို့၌ ဖြေဆိုခွင့်ရှိသူကျောင်းသား ကျောင်းသူ(၈၄၄၃၅၈)ဦးရှိသည့်အနက် (၇၈၉၀၇၀)ဦးဖြေဆိုခဲ့ကြပြီး ပျက်ကွက်သူဦးရေ (၅၅၂၈၈)ရှိသဖြင့် ဖြေဆိုမှုရာခိုင်နှုန်းမှာ ၉၃ ဒသမ ၄၅ရာခိုင်နှုန်းရှိကြောင်း သိရသည်။ ပြည်ထောင်စုနယ်မြေ နေပြည်တော်၌စာစစ်ဌာနပေါင်း(၄၄)ခုတွင်(၂၃၈၅၀)ဦးစာရင်းပေးသွင်းကြပြီး(၂၂၃၅၇)ဦးဝင်ရောက်ဖြေဆိုကာ ပျက်ကွက်သူဦးရေ (၁၄၉၃)ဦးရှိသဖြင့် ဖြေဆိုမှုရာခိုင်နှုန်းမှာ ၉၃ ဒသမ ၉၄ ရာခိုင်နှုန်းဖြစ်ကြောင်း သတင်းရရှိသည်။
No comments:
Post a Comment