သင်ယူမှုအခွင့်အလမ်းမြင့်မားရေး၊ အရည်အသွေးရှိသော သင်ယူမှု ပူးပေါင်းအကောင်အထည်ဖော် ဆောင်ရွက်ရေး ညှိနှိုင်းဆွေးနွေးပွဲ ကျင်းပ

နေပြည်တော် ၂၀၂၀ ဇန်နဝါရီ ၁၃

သင်ယူမှုအခွင့်အလမ်း မြင့်မားရေး၊ အရည်အသွေးရှိသောသင်ယူမှု ပူးပေါင်းအကောင်အထည်ဖော် ဆောင်ရွက်ရေးညှိနှိုင်းဆွေးနွေးပွဲ အခမ်းအနားကို ယနေ့ နံနက် (၉)နာရီတွင် နေပြည်တော် မင်္ဂလာဗျူဟာခန်းမ၌ ကျင်းပသည်။ ရှေးဦးစွာ နေပြည်တော်ကောင်စီဥက္ကဋ္ဌ ဦးမျိုးအောင်က နိုင်ငံတော်၏မူဝါဒအရ နေပြည်တော်အား ပညာရေးကိုအခြေပြုသည့် နယ်မြေတစ်ခုဖြစ်လာစေရန် ရည်မှန်းချက်ထား ဆောင်ရွက်နေပါကြောင်း၊ နေပြည်တော်၏တည်ဆောက်ပုံအရ ပညာရေးဖွံ့ဖြိုးရန်သင့်လျော်သည့် နယ်မြေဖြစ်သည့်အတွက် အနာဂါတ်မြို့ပြစီမံကိန်းကို ချမှတ်ဆောင်ရွက်နေပါကြောင်း၊ တစ်ချိန်တစ်ခါက နေပြည်တော်သည် အရှေ့တောင်အာရှတွင် တစ်ခုတည်းသောနိုင်ငံတကာအသိအမှတ်ပြု အဆင့်မြင့်တက္ကသိုလ်များဖြစ်သော သစ်တောတက္ကသိုလ်၊ စိုက်ပျိုးရေးတက္ကသိုလ်၊ မွေးမြူရေးတက္ကသိုလ်တို့ တည်ရှိရာဒေသ ဖြစ်ခဲ့ပါကြောင်း၊ ယခုအခါ ယင်းတက္ကသိုလ်များအပြင် တစ်ခြားသောတက္ကသိုလ်များ၊ နိုင်ငံတကာအသိ အမှတ်ပြုတက္ကသိုလ်ကြီးများ ဖွင့်လှစ်နိုင်ရေးတို့အတွက် ပညာရေးဝန်ကြီးဌာနနှင့် ညှိနှိုင်းဆောင်ရွက်လျှက်ရှိပါကြောင်း၊ ကျောင်းသင်္ခန်းစာများတွင်လည်း စာရိတ္တမဏ္ဍိုင်ခိုင်ခန့်စေမည့် သင်ရိုးများဖြင့် မြှင့်တင်ဆောင်ရွက်စေလိုပါကြောင်း၊ ယနေ့ကျင်းပသည့် ညှိနှိုင်းဆွေးနွေးပွဲမှ အနာဂါတ်တွင် အားကိုးရမည့်နိုင်ငံသူ နိုင်ငံသားကောင်းမျိုးဆက်သစ်များ မွေးထုတ်ပေးနိုင်မည့် အကျိုးရလဒ်ကောင်းများ ရရှိနိုင်မည်ဟု ယုံကြည်ပါကြောင်းစသည်ဖြင့် နှုတ်ခွန်းဆက်အမှာစကား ပြောကြားသည်။ ထို့နောက် ပညာရေးဝန်ကြီးဌာန ပြည်ထောင်စုဝန်ကြီး ဒေါက်တာမျိုးသိမ်းကြီးက ကျောင်းနေအရွယ်ကလေးများ မူကြိုမှစ၍ မူလတန်း၊ အလယ်တန်း၊ အထက်တန်းပညာရေး၊ အသက်မွေးဝမ်းကျောင်းပညာရေး၊ တက္ကသိုလ်ပညာရေး၊ ဘဝတစ်သက်တာအတွက် အလုပ်လုပ်ရင်း ထပ်လိုအပ်၍သင်ယူသော ပညာရေးအထိ သင်ယူနိုင်ရန်အခွင့်အလမ်းသည် အရေးကြီးပါကြောင်း၊ သင်ယူမှုအခွင့်အလမ်း မြင့်မားရေးနှင့် အရည်အသွေးရှိသော သင်ယူမှုပူးပေါင်းအကောင် အထည်ဖော်ဆောင်ရွက်ရေး ဝိုင်းဝန်းပူးပေါင်း ဆောင်ရွက်ကြရမည်ဖြစ်ပါကြောင်း၊ နိုင်ငံတော်၏အတိုင်ပင်ခံပုဂ္ဂိုလ်က အထက (၂) ပျဉ်းမနားတွင်ကျင်းပသည့် ဆဋ္ဌမတန်းဆွေးနွေးပွဲသင်တန်းတွင် မိမိတို့နိုင်ငံဖွံ့ဖြိုးတိုးတက်ရန် လိုအပ်နေပါကြောင်း၊ အဓိကမှာ ပညာရေးစနစ်ဖြစ်ပါကြောင်း၊ ပညာရေးစနစ်မှန်ကန်လျှင် အခြားနိုင်ငံများအား ရင်ပေါင်တန်းပြီး အချိန်အတိုအတွင်း အမီလိုက်နိုင်မည်ဖြစ်ပါကြောင်း၊ မိမိတို့နိုင်ငံရှိ ကျောင်းသား ကျောင်းသူများအား အခြားနိုင်ငံများမှ ကျောင်းသား ကျောင်းသူများထက် တစ်မူထူးပြီးတော်စေချင်ပါကြောင်း၊ ကျောင်းစာသာမက စာရိတ္တပိုင်းနှင့် ပူးပေါင်းဆောင်ရွက်မှု အပိုင်းတွင်တော်စေချင်ပါကြောင်း၊ ကျောင်း၊ ကျောင်းအုပ်၊ ဆရာ ဆရာမ၊ ကျောင်းသား ကျောင်းသူများ၏ လိုအပ်ချက်များကို ဖြည့်ဆည်းဖြေရှင်း ဆောင်ရွက်ပေးရန်၊ မိမိတို့နိုင်ငံသားများ အတူပူးပေါင်းပြီး အစုအဖွဲ့အလိုက်ဆောင်ရွက်ရာတွင် တော်စေချင်ပါကြောင်း၊ မိမိတို့လူမှုအသိုင်းအဝိုင်း ပျော်ရွှင်ရန် တိုးတက်ရန် လုပ်ဆောင်ပေးနိုင်သည့် ကလေးငယ်များကို မွေးထုတ်ချင်ပါကြောင်း၊ အဓိကကျသည်မှာ ဆရာ ဆရာမများဖြစ်ပါကြောင်း၊ သင်တန်းသား ဆရာ ဆရာမများအနေဖြင့် သင်ယူရာတွင် တော်ကြသည်ကိုသိရှိပါကြောင်း၊ သင်ယူရာတွင်တော်ကြသကဲ့သို့ သင်ကြားရာတွင်လည်း တော်ကြရမည်ဖြစ်ပါကြောင်း၊ ဆရာ ဆရာမများအနေဖြင့် ကျောင်းသား ကျောင်းသူများ စာသင်ချိန်နှင့်ကျောင်းတွင် ပျော်ရွှင်အောင် မည်သို့ဆောင်ရွက်ရမည်ကို စဉ်းစားရမည်ဖြစ်ပါကြောင်း၊ ကလေးများ ကျောင်းသွားရသည်ကို ပျော်မှသာ ပညာတတ်များဖြစ်မည် ဖြစ်ပါကြောင်း စသည်ဖြင့် လမ်းညွှန်မှာကြားခဲ့ပါကြောင်း၊ ပညာရေးဝန်ကြီးဌာနအနေဖြင့် ၂၁ရာစုပညာရေးစနစ်နှင့်အညီ ကျောင်းသုံးဖတ်စာအုပ်များ အသစ်ပြုစုခြင်း၊ သင်ကြား သင်ယူမှုနည်းလမ်းများ ကောင်းမွန်စေရေး ဆရာ ဆရာမများအားလုံးကို သင်တန်းပေးခြင်း၊ သင်ထောက်ကူပစ္စည်းများ ဖြန့်ဝေပေးခြင်း၊ ဆရာ ဗဟိုပြုသင်ကြားမှုမှ သင်ယူသူ ဗဟိုပြုသင်ကြားသင်ယူလေ့ကျင့်ပေးသည့် ပရိုဂျက်အခြေပြုသင်ယူရေး မွမ်းမံသင်တန်းပေးခြင်းတို့ကို ခွင့်ပြုဘဏ္ဍာငွေအရ စီစဉ်ဆောင်ရွက်ပေးလျက်ရှိပါကြောင်း၊ စာမေးပွဲဖြေရန်သင်ယူခြင်းထက် တစ်သက်တာသင်ယူနိုင်ရန်၊ အလွတ်ကျက်မှတ်သည့်ပညာရေးစနစ်မှ နက်နက်နဲနဲသင်ယူကာ စဉ်းစားတွေးခေါ်နိုင်စွမ်းရှိရန် အကောင်အထည်ဖော် ဆောင်ရွက်လျက်ရှိပါကြောင်း၊ နိုင်ငံတော်အနေဖြင့် နိုင်ငံသူ နိုင်ငံသားများ၏ အနာဂတ်သာယာလှပရေးအတွက် ပညာရေးတွင် ရင်းနှီးမြုပ်နှံဖြည့်ဆည်း ဆောင်ရွက်ပေးလျှက်ရှိရာ ပညာရေးဝန်ကြီးဌာနနှင့် ပညာရေးမိသားစုများ အနေဖြင့် ပညာရေးပြုပြင်ပြောင်းလဲမှု ဆောင်ရွက်ရာတွင် အတွေ့အကြုံများကိုအခြေခံ၍ အားသာချက်များကို ပိုမိုအားကောင်းမွန်အောင် အားနည်းချက်များကို ပြန်လည်ဆွေးနွေး ညှိနှိုင်းပြီးအားကောင်းအောင် ဆက်လက်ပူးပေါင်း ဆောင်ရွက်သွားကြရမည် ဖြစ်ပါကြောင်းစသည်ဖြင့် ဆောင်ရွက်ပြီး၊ ဆောင်ရွက်ဆဲ၊ ဆက်လက်ဆောင်ရွက်မည့် ပညာရေးလုပ်ငန်းစဉ်များအား ပါဝါပွိုင့်ဖြင့်ရှင်းလင်း ပြောကြားသည်။ ဆက်လက်၍ ညွှန်ကြားရေးမှူးချုပ် ဒုတိယညွှန်ကြားရေးမှူးချုပ်များက ပညာရေးသုတေသန စီမံကိန်းနှင့် လေ့ကျင့်ရေးကဏ္ဍ၊ အခြေခံပညာကဏ္ဍ၊ ကျောင်းပြင်ပနှင့် တစ်သက်တာ ပညာရေးဏ္ဍ၊ နည်းပညာ သက်မွေးပညာနှင့် လေ့ကျင့်ရေးကဏ္ဍ၊ အဆင့်မြင့်ပညာကဏ္ဍ၊ စသည့်သက်ဆိုင်ရာ ကဏ္ဍများအလိုက် အသီးသီး ဆွေးနွေးကြသည်။ ယင်းနောက် တက်ရောက်လာသူများ သိရှိလိုသည်များကို ဆွေးနွေးမေးမြန်းကြရာ ပြည်ထောင်စုဝန်ကြီးနှင့် သက်ဆိုင်ရာညွှန်ကြားရေးမှူးချုပ်များနှင့် တာဝန်ရှိသူများက ပြန်လည်ဆွေးနွေးဖြေကြား၍ လိုအပ်ချက်များ ဖြည့်ဆည်းနိုင်ရေး ပေါင်းစပ်ညှိနှိုင်း ဆောင်ရွက်ပေးသည်။ ညှိနှိုင်းဆွေးနွေးပွဲသို့ နေပြည်တော်ကောင်စီဥက္ကဋ္ဌ၊ ဒုတိယဝန်ကြီး ဦးဝင်းမော်ထွန်း၊ နေပြည်တော်ကောင်စီ အဖွဲ့ဝင်များ၊ လွှတ်တော်ကိုယ်စား လှယ်များ၊ ပညာရေးဝန်ကြီးဌာနမှ ညွှန်ကြားရေးမှူးချုပ် ဒုတိယညွှန်ကြားရေးမှူးချုပ်များနှင့် တာဝန်ရှိသူများ၊ နေပြည်တော်ကောင်စီ နယ်မြေပညာရေးမှူး၊ မြို့နယ်ပညာရေးမှူးများ၊ ကျောင်းအုပ်များ၊ ဆရာ ဆရာမများ၊ ကျောင်းသား ကျောင်းသူများ၊ မိဘအုပ် ထိန်းသူ ပြည်သူများနှင့် သက်ဆိုင်ရာတာဝန်ရှိသူများ တက်ရောက်ကြကြောင်း သတင်းရရှိသည်။